ការលួចចម្លងស្នាដៃសិល្បៈពីបរទេស មានទោសទណ្ឌទេ?
រឿងរ៉ាវនៃការលួចបទចម្រៀងវៀតណាម "I'm Sorry Babe” កំពុងជារឿងរ៉ាវក្តៅគគុកលើបណ្តាញសង្គមប៉ុន្មានថ្ងៃនេះ។ ទន្ទឹមនឹងការរិះគន់លួចចម្លងស្នាដែរបស់ខ្លួន អ្នកនិពន្ធវៀតណាម លោក Bao Thach ថែមទាំងព្រលយពាក្យថា ទោះបីជាបទលោកត្រូវគេចម្លងក៏ដោយ តែលោកក៏គ្មានដំណោះស្រាយដែរ ព្រោះកម្ពុជាមិនទាន់ចូលជាសមាជិកសមាគមការពារកម្មសិទ្ធិបញ្ញាបទចម្រៀង។
ឆ្លើយតបទៅនឹងការឡើងលើករបស់អ្នកនិពន្ធវៀតណាមរូបនេះ លោក ស៊ិន សារ៉ាឌី ប្រធាននាយកដ្ឋាន សិទ្ធិអ្នកនិពន្ធ និងសិទ្ធិប្រហាក់ប្រហែល នៃក្រសួងវប្បធម៌ និងវិចិត្រសិល្បៈ ថា ជាការពិតប្រទេសកម្ពុជា មិនទាន់បានចូលជាសមាជិកអនុសញ្ញាទីក្រុងប៊ែន ស្តីពីស្នាដៃអក្សរសាស្ត្រ និងសិល្បៈ (Berne Convention) នៅឡើយ។ លោកថា ក្នុងចំណោមប្រទេសជាសមាជិកអាស៊ាន មានតែកម្ពុជា និងមីយ៉ាន់ម៉ាទេ ដែលមិនទាន់បានចូលជាសមាជិក ខណៈវៀតណាមបានចូលជាសមាជិកអនុសញ្ញានេះតាំងពីឆ្នាំ២០០៤។
ចំពោះមូលហេតុដែលប្រទេសកម្ពុជាមិនទាន់បានចូលជាសមាជិកអនុសញ្ញាទីក្រុងប៊ែន ប្រធាននាយកដ្ឋានដដែលអះអាងថា មកការយល់ដឹងពីកម្មសិទ្ធិបញ្ញារបស់ពលរដ្ឋ និងអ្នកពាក់ព័ន្ធនៅមានកម្រិត «យើងមិនមែនគេចវេះនោះទេ តែយើងគិតផលប្រយោជន៍ជាតិជាធំ ហើយបច្ចុប្បន្នក្រសួងកំពុងសិក្សាពីផលប្រយោជន៍ និងផលប៉ះពាល់នៃអនុសញ្ញានេះ»។
លោក ស៊ិន សារ៉ាឌី បានបន្តថា បច្ចុប្បន្នយើងនៅប្រើស្នាដៃបរទេសច្រើន មិនថា ថៃ វៀតណាម អាមេរិក អង់គ្លេស នោះទេ ចង់មិនចង់ប្រសិនបើយើងចូលជាសមាជិកក្នុងពេលនេះជួបផលលំបាកច្រើន ព្រោះអនុសញ្ញានេះឲ្យតែយើងធ្វីខុស ឬលួចចម្លងស្នាដៃរបស់គេ គេនឹងប្តឹង។ តែទន្ទឹមនឹងនោះស្នាដៃរបស់យើងក៏ត្រូវបរទេសលួចចម្លងបានដូចគ្នា ដោយពុំមានការដាក់ទោសទណ្ឌ។
ទោះយ៉ាងណាក៏ដោយកម្ពុជាបានចូលជាសមាជិកក្នុងកិច្ចព្រមព្រៀង ស្តីពីប្រសិទ្ធភាពកម្មសិទ្ធិបញ្ញា ទាក់ទងនឹងពាណិជ្ជកម្ម របស់អង្គការ WTO កាលពីឆ្នាំ២០០៤ ដែលក្នុងកិច្ចព្រមព្រៀងនោះបញ្ជាក់ ថា រដ្ឋជាភាគីត្រូវគោរពតាមលក្ខខណ្ឌដែលមានចែងក្នុងកិច្ចព្រមព្រៀងនេះ។ ដោយហេតុថា ជាដំណាក់កាលអន្តរកាល ហេតុដូចនេះកម្ពុជាទទួលបានការអនុគ្រោះខ្លះលើបញ្ហានេះ។
ក្នុងន័យចូលរួមលើកកម្ពស់ឲ្យមានការបង្កើតស្នាដៃថ្មី បញ្ជ្រាបការយល់ដឹងពីកម្មសិទ្ធិបញ្ញា កន្លងមកក្រសួងតែងតែបើកវគ្គបណ្តុះបណ្តាលផ្សេងៗ ដោយអញ្ជើញមន្រ្តីស្ថាប័នពាក់ព័ន្ធចូលរួមសិក្សាស្វែងយល់ ពិសេសខាងផលិតកម្ម។ លោកថា ការខកខាន ឬមិនយកចិត្តទុកដាក់ចំពោះបញ្ហាខាងលើ គឺជាមូលហេតុដែលអ្នកនិពន្ធមួយចំនួន នៅតែបន្តលួចចម្លងស្នាដៃបរទេស ដោយពុំុំមានសុំអនុញ្ញាតពីម្ចាស់ដើម។
បើតាមលោក ស៊ិន សារ៉ាឌី ឱសានវាទនៃការចូលរួមជាសមាជិកអនុសញ្ញានេះរបស់កម្ពុជា គឺឆ្នាំ២០២១ ខាងមុខនេះ៕
ការលួចចម្លងស្នាដៃសិល្បៈពីបរទេស មានទោសទណ្ឌទេ?...
រឿងរ៉ាវនៃការលួចបទចម្រៀងវៀតណាម "I'm Sorry B
អនុវត្តន៍វិធីទាំង៥ខាងក្រោមដើម្បីស្តារចំណង់ផ្លូវភេទ...
នេះគឺជាគន្លិះខ្លះចំពោះអ្នកដែល