នៅ​ប្រទេស​ជប៉ុន​ល្ងាច​មុន​​បុណ្យណូអែល​១​ថ្ងៃ គឺ​ជា​រាត្រី​នៃ​ការ​​ជួប​ជុំ​​ដ៏​ធំ​បំផុត​ប្រចាំ​ឆ្នាំ​ ខណៈ​ដែល​ភោជនីយដ្ឋាន​អាហារ​ទាន់​ចិត្ត (fast food) គឺ​ជា​កន្លែង​ដែល​ក្រុមគ្រួសារ មិត្តភក្តិ ឬ គូស្នេហ៍​ចូល​ចិត្ត​ទៅ​ ប៉ុន្តែ​ភោជនីយដ្ឋាន​មួយ​កន្លែង​មិន​ទទួល​ស្វាគមន៍​ពួកគេ​ទេ។

​ភោជនីយដ្ឋាន​មួយ ដែល​មាន​ឈ្មោះ​ថា Pia Pia ទុក​ឱកាស​ពិសេស​១​ថ្ងៃ​ទី ២៤ ខែ​ធ្នូ​ គឺ​ល្ងាច​មុន​បុណ្យ​ណូអែល​មួយ​ថ្ងៃ ដើម្បី​ឲ្យ​​ភ្ញៀវ​ដែល​គ្មាន​គូអាច​ទៅ​ញ៉ាំ​អាហារ​​នៅ​ហាង​របស់​ខ្លួន​តាម​លក្ខណៈ sad​ បណ្តែត​អារម្មណ៍ ដោយ​គ្មាន​ការ​រំខាន​ពី​គូស្នេហ៍ និងអ្នកក​មាន​គ្រួសារ​ដទៃ​ទៀត។

ម្ចាស់​ហាង​បាន​និយាយ​ថា​​គោលបំណង​ដែល​​លោក​ធ្វើ​យ៉ាង​នេះ គឺ​ដើម្បី​ជំរុញអារម្មណ៍​វិជ្ជមាន​របស់​អតិថិជន​ឲ្យ​រីករាយ​ជាមួយ​បរិយាកាស​ដែល​គ្មាន​គូ​របស់​ពួកគេ។

លោក​ខ្លួន​ឯង​ផ្ទាល់​បាន​និយាយ​ថា​ នៅ​ពេល​ដែល​លោក​នៅ​ក្មេង លោក​គ្មាន​សង្សារ​សម្រាប់​ការ​ណាត់​នៅ​ថ្ងៃ​ពិសេស​នេះ លោក​មាន​អារម្មណ៍​ថា​​គ្មាន​កន្លែង​ដែល​ត្រូវ​ទៅ ម្ល៉ោះហើយ​លោក​សង្ឃឹម​ថា​ហាង Pia Pia របស់​លោក​នឹង​អាច​ជា​ឋានសួគ៌​សម្រាប់អ្នក​ដែល​ចង់​ភៀស​ខ្លូន​ទៅ​រក​តំបន់​ដែល​គ្មាន​ស្នេហា៕

ប្រែ​សម្រួល៖ សុខ លាងហ៊ត
ប្រភព៖ Sabay News